[99va] Item. Quaestio quid est praesupponit quaestionem si est, ergo et
propositio propositionem ; ergo ista " omnis homo est animal ",
cum dicat quid est homo, praesupponit istam " omnis homo est " ;
et sic ut prius. Item. Boecius in commento libri Perihermenias distinguit
necessitatem in necessitatem absolutam et necessitatem ex suppositione,
et dicit quod necessitas absoluta est tantum in Causa prima, ut cum dicetur
" Deus est iustus ", in omnibus vero aliis ex suppositione ;
unde ista " ignis est calidus " non est necessaria nisi
dum ignis est, nec ista " homo est mortalis " nisi dum
est homo ; et sic sequitur ut prius. Item. Ipse idem Boecius dicit
in commento Marci Tullii quod unio rerum ponit existentiam earum ;
et sic ut prius. Item. Intellectus componens dicit inhaerentiam extremi
ad extremum ; sed illud quod non est nulli potest inhaerere ;
similiter ei quod non est nihil potest inhaerere ; ergo necessario
requirit utrumque extremum ; et sic ut prius. Item. Ab eo quod res
est vel non est dicitur oratio vera vel falsa; et sic patet idem. Contra.
Si ita esset, scientiae mathematicae multotiens perirent ; res enim
mathematicae sunt in rebus naturalibus et eaedem cum eis et differunt solum
ratione ; ergo rebus ipsis non existentibus essent suae praemissae
et conclusiones falsae, quae ipsis existentibus essent verae. Demonstratio
autem ostensiva non est ex falsis ; perirent ergo suae demonstrationes.
Item. Extremis existentibus impossibilibus est compositio necessaria, sicut
patet in ista " Chimaera est figmentum " ; ergo
multo fortius ipsis existentibus et possibilibus et dicentibus rem et naturam ;
ergo necessitas compositionis non requirit existentiam extremorum. Item.
Dicit Aristoteles quod non fit demonstratio de ista linea, sed de illa quae
per hanc intelligitur ; ergo linea in materia sensibili non facit ad
veritatem propositionis demonstrativae nisi solum ad manifestationem, sed
solum esse eius est in intellectu. Demonstratio autem est " ex
veris et primis, etc. " ; et sic veritas compositionis non
requirit existentiam extremorum extra intellectum. Et quia ista sunt insufficienter
dicta, nos addemus eis alia suis locis. |