Les Diverses leçons de Loys Guyon (...) suivans celles de Pierre Messie (...)

Avant que clorre ce chapitre, je veux amener deux experiences de l'efficace de la Musique, que j'ay veu practiquer sur deux Damoiselles, l'une desquelles estoit de la Marche, près de Garet, jeune, vertueuse, & de passable beauté, qui tomba en telle furie, par un rapport qu'on luy avoit fait, que son mari alloit au change, qu'à tout moment de temps elle se vouloit precipiter tantost dedans un feu, ores par une fenestre, autresfois dans un estang qui estoit près de sa maison, dont elle fut retirée deux fois: c'est pourquoy on commit des gens pour la garder. Les Medecins n'y peurent rien rapporter du leur, mais un seul Capussin religieux, passant par là, & demandant la passade à la maison de ceste Damoiselle, ayant entendu l'estrange cas advenu à ceste Damoiselle, donna advis qu'on eust un joueur de luth, qui ne bougeast de longtemps d'auprès d'elle, & que sans doute cela lui passeroit/504/ & que la nuict on chantast chansons aupres de son lict: ce qui fut executé, & dans trois mois ceste fureur luy passa, & est à présent bien de son esprit.